Eid al-Fitr

La finiziun dal mais da gigina Ramadan festiveschan las muslimas ed ils muslims cun la festa «Eid al Fitr». La festa cuzza plirs dis e tradiziunalmain vegnan magliadas tratgas da tuttas sorts. Savens era spaisas dultschas.

La festa tradiziunala cumenzà cun in’uraziun communabla en ina moschea – qua en l’India.
Legenda da maletgs: La festa tradiziunala cumenzà cun in’uraziun communabla en ina moschea – qua en l’India. Keystone

A chaschun da la festa engrazian muslimas e muslims a Dieu per la forza e perseveranza ch'els han gì durant il Ramadan. Tgi che n'ha betg tegnì tras la gigina po dumandar per perdun. A la festa da «Eid al Fitr» s'entaupan ils muslims cun vischins, parents, amis ed enconuschents e maglian spaisas tradiziunalas. En spezial vegnan servidas tratgas dultschas sco pettas, pauns dultschs u autras patissarias.

Lunga preparaziun

La festa che cuzza plirs dis vegn per il solit gia preparada dis avant. Las dunnas cuschinan las tratgas, schubregian la chasa u abitaziun e preparan tut per envidar en la glieud. Normalmain valan quels dis era sco dis da firà.

Autur/a: Selina Chistell