«Dreamers» - uffants d'immigrants illegals en ils Stadis Unids

Bun 800'000 uffants e giuvenils d'immigrants illegals èn creschids si, ids a scola e lavuran en ils Stadis Unids.

Protest cunter la decisiun da Trump da sistir «Dreamer Act».
Legenda da maletgs: Ina «Dreamer» che demonstrescha cunter la decisiun da Trump da sistir il «Dreamer Act» Keystone

Ina lescha «Deferred Action for Childhood Arrivals» (DACA) introducida l'onn 2012 da Barack Obama aveva la finamira da proteger quels uffants e giuvenils. Sut tschertas cundiziuns survegnevan els schizunt il dretg da restar en ils Stadis Unids, p. ex. na dastgavan els betg avair problems cun il dretg u stuevan avair ina scolaziun.

Trump fa in pass en favur dals «Dreamers»

Il president actual Donald Trump ha sistì questa lescha. Tenor el èn ils «Dreamers» criminals e custan mintg'onn milliardas a l'economia. El tramettess il pli gugent els or dal pajais. Quai ha chaschunà protestas e schizunt plants cunter la decisiun.

En il process da chattar ina nova regulaziun per ils «Dreamers» è Trump uss però s'inscuntrà cun represchentants dals democrats (partida da Barack Obama). Tenor rapports da diversas medias sajan els secunvegnids da betg trametter ils uffants e giuvenils or dal pajais.

Autur/a: Gion Gieri Flepp