David Copperfield festivescha 60

El è quel che ha laschà svanir la statua da la libertad a New York - il magier ed illusiunist David Copperfield. Ed el è er cun 60 onns anc adina sin turnea cun ses trics - ubain sin ina da sias inslas en las Bahamas.

David Copperfield, in dals pli renumads magiers, festivescha 60.
Legenda da maletgs: David Copperfield, in dals pli renumads magiers, festivescha 60. Reuters

Esser in dals pli renumads illusiunists para dad esser lucrativ: David Copperfield posseda numnadamain 11 inslas sin las Bahamas. Inslas, nua che er schon stars sco Bill Gates ubain Johnny Depp han fatg vacanzas.

Cumenzà ha la carriera da Copperfield, cun num original David Kotkin, figl dad immigrants russ, a New York sin partys da uffants. Schon cun 11 onns fageva el tricks che han purtà ad el bler renconuschientscha da la societad da magiers americans. Cun 17 ha el lura giugà en in musical da magia "The magic man".

Propi renumads è el lura vegnì cun sia seria da televisiun. Là ha el fatg live trics pli e pli spectaculars sco per exempel laschar svanir in Ferrari, in aviun, in vagun da l'Orient Express ubain schizunt la statua da libertad. Sper il laschar svanir chaussas è el er enconuschent per ses trick da la fugia or da la praschun dad Alcatraz ubain per ir cun ina puntera ardenta giu da las cascadas da Niagara.

Autur/a: RTR/sb