Conto dad offshore

Ils Panama Papers vegnan ad occupar nus il proxim temp. Ils varga 11.5 milliuns documents mussan numnadamain infurmaziuns davart passa 200'000 contos dad offshore.

Bartga da palpiri.
Legenda da maletgs: Panama Papers: Ins quinta cun passa 200'000 contos dad offshore. KEYSTONE

Contos dad offshore èn contos ch'ins ha en in auter pajais. Per ch'il conto è propi anonim ston ins far il conto en in pajais nua che quai è anc permess, sco per exempel Panama, Hongkong u la Malaisia.

Da princip è nagut problematic vid in tal conto. Mintgin po deponer u investir ses raps cura e nua ch'el vul. El sto simplamain pajar las impostas per quels raps en ses pajais domicil.

Pertge fan ins tals contos?
L'interessant vid in tal conto è ch'il conto è anonim. En Europa ston las bancas dar ora infurmaziuns sche la procura publica pretenda quellas. Pajais sco Panama, Honkong u la Malaisia na collavuran betg cun las bancas da l'Europa e na ston perquai era betg dar enavant infurmaziuns dals contos dad offshore. Uschia na sa nagin quants raps ch'èn propi sin quels contos ed a tgi che quai conto tutga. Tals contos vegnan fatgs per betg stuair pajar taglia e per zuppentar ch'ins ha ina relaziun u ina collavuraziun cun firmas dubiusas u cun persunas criminalas.

Autur/a: RTR/cl