Canera

Oz è il di cunter la canera. Dentant tge è propi la definiziun da canera? Canera è fitg subjectiv ...

Traffic: la gronda funtauna da canera en Svizra
Legenda da maletgs: Traffic: la gronda funtauna da canera en Svizra Keystone

Magari è la musica da festa buna ed ins taidla gugent, sche la musica vegn dentant or da l'abitaziun vischina e quai da mesanotg è ella plitost canera. Cunzunt sch'ins vul durmir ubain sto sa concentrar vegnan ramurs spert tar canera. En general pon ins dentant dir: Pli dad aut ch'ina ramur è, e pli probabel ch'ella vegn recepida sco mulestusa. 

En il mintgadi èn las ramurs las pli mulestusas per exempel in marti pneumatic cun 100 decibels ubain trens, boeings u gronds camiuns cun 90 decibel.

Memia bler canera po er esser nuschaivel. Cun ramurs da tranter 65 e 75 decibel, per exempel la ramur dad in segapastget ubain dad in telefon entschaiva il corp ad avair stress, quai che po manar tar ina pressiun auta.

Tar tuns permanents sur 85 decibel è l'udida dal carstgaun pereclitada. Va il pegel sur 110 decibel tanscha er gia in sulet tun per donnegiar l'udida - quai è per exempel il tun dad in jet.

En Svizra è durant il di mintga tschintgavla e durant la notg mintga sisavla persuna pertutgada da canera mulestusa. La pli gronda funtauna da canera è il traffic suandà dal tren e d'aviuns. Latiers vegn la canera da bajegiar ubain la canera d'industria. Tar in studi da l'onn 2007 han er 18 pertschient da las persunas dumandadas inditgà, ch'els vegnan mulestads da canera dals vischins, per exempel d'uffants, restaurants, chauns ubain da tutgiez.

Autur/a: RTR/sb