Brian Wilson

Il musicist Brian Wilson vala sco scheni da la band americana Beach Boys. En ils onns sessanta e settanta han ils Beach Boys gì grond success ed oz festivescha Brian Wilson ses 75avel anniversari.

Cun hits sco «Surfin USA» han ils Beach Boys festivà in success enorm – oz e Brian Wilson persuls sin tribuna.
Legenda da maletgs: Cun hits sco «Surfin USA» han ils Beach Boys festivà in success enorm – oz e Brian Wilson persuls sin tribuna. Keystone

Gia sco uffant ha il bab da Brian Wilson vis ses talent musical ed era promovì quel. Medis han gia en sia uffanza constatà che Wilson è bunamain surds sin in'ureglia. Quai dentant n'ha betg impedì el da far musica sco giuvenil e pli tard lura era fundar l'onn 1961 ensemen cun ses dus frars, in cusrin ed in collega da scola la band Beach Boys.

Il chau creativ da la band

Brian Wilson è tranter auter la vusch da falset dals Beach Boys. Sper il chant ha el dentant anc cumponì ina bella part da las chanzuns dals Beach Boys, producì varga 20 albums e sunà il keyboard ed il bass. Cun il success è dentant er il squitsch sin la band vegnì pli grond. Per restar creativ e productiv ha Brian Wilson lura consumà drogas.

Oz è l'anteriur Beach Boy dentant puspè enavos sin la via da success. Sco musicist da solo è el anc adina activs e va sin turnea. El ha era edì varga in tozzel albums. Sper la musica passenta el bler temp cun sia segunda dunna e ses set uffants.

Autur/a: Selina Chistell