Baschar Hafiz al-Assad

Il president da la Siria, Baschar al-Assad ha dà in'intervista exclusiva a la Rundschau dad SRF. Assad valeva ina giada sco refurmatur moderà.

Baschar al-Assad
Legenda da maletgs: Baschar al-Assad en discussiun Keystone

Baschar al-Assad ha studegià medischina a Damascus en Siria ed a Londra en Gronda Britannia. Perquai che ses frar pli vegl è mort il 1994 è Baschar turnà en Siria. L'onn 2000 è ses bab mort e Baschar ha surpiglià il presidi da la Siria.

Dal refurmatur tar il dictatur
Il cumenzament valeva el sco refurmatur moderà. Tranter auter ha el introducì ina campagna d'anti-corrupziun. Critica constructiva entaifer l'administraziun è er vegnida pussaivla. Il 2001 han intellectuals da la Siria tuttenina gì la libertad da s'exprimer, enconuschent sco primavaira da Damascus. Ma la pretensiun da refurmas democraticas è creschida uschè svelt, uschia ch'i ha dà ord la primavaira l'enviern da Damascus. Las libertads èn vegnidas restrenschidas.

Schebain en Siria sco er en il vest eran ins il cumenzament da l'avis, che Baschar al-Assad saja stà da buna veglia da refurmar ses pajais, ma che la garda veglia da ses bab haja impedì quai. Oz èn ins da l'avis, che Baschar al-Assad sez haja sistì las refurmas. Il motiv: Assad temeva per la stabilitad dal reschim.

Autur/a: cc