Avicii

Il DJ svedais è mort venderdi saira en la citad principala dal Osman, Maskat, en la vegliadetgna da be 28 onns.

Tim Bergling alias DJ Avicii è mort surprendentamain en la vegliadetgna da 28 onns.
Legenda da maletgs: Tim Bergling alias DJ Avicii è mort surprendentamain en la vegliadetgna da 28 onns. Keystone

Cun hits sco «Levels», «Wake me up» u «The Days» ha el cuntanschì renum internaziunal. El vala sco piunier da la nova musica electronica. Cun 16 onns ha Tim Bergling (num civil) cumenzà a far musica. Be dus onns pli tard era el gia sin turnea per l'entir mund enturn.

Premis e collavuraziuns

Per sia musica ha Avicii tranter auter survegnì dus MTW music awards ed Echos. Er ha el collavura cun ils gronds nums da la scena da musica: Da Madonna u Robbie Williams fin tar David Guetta e Coldplay. Il 2014 ha el tenor rapports da medias gudagnà radund 28 milliuns dollars.

Tut memia bler

Il 2016 è il giuven DJ svedais lura sa decidì da betg pli ir sin turnea e dar concerts live. Quai suenter ch'el aveva fatg memia bler festa e bavì memia bler alcohol. Sco consequenza da quest stil da viver ha el stuì laschar operar pliras giadas divers organs.

Chalar da far musica n'è però mai stà in tema. El è sa concentrà sin la lavur en il studio ed aveva er planisà d'edir anc plirs albums.

Autur/a: Gion Gieri Flepp