S. Gion Eudes

In sontg nunenconuschent

Chasper Pult.
Legenda da maletgs: Chasper Pult. RTR, Guadench Dazzi

Darar inditgeschan ils differents chalenders rumantschs il medem num. Per questa sonda menziunan tuts in tschert Johannes Eudes ch'è mort ils 19 d'avust 1680 a Caen en Frantscha. El è naschì 1601, ha frequentà ina scola da Gesuits ed è daventà spiritual cun far part da la congregaziun dals Oratorians. Cur ch'el ha vesì che blers spirituals n'eran betg preparads bain per lur uffizi, ha Johannes fundà la nova cuminanza d'urden CIM, la Congregatio Jesu et Mariae, ch'exista fin oz. Interessant è da vesair quantas cuminanzas ch'existan – da las qualas nus enconuschain mo paucas – sco ils Gesuits, ils Salesians, ils Marians, euv. Tge connex che sias ovras han indirectamain cun Maria Madlaina è ina surpraisa.

Redacziun: Chasper Pult