Glas

Quest enviern pudain nus giudair las muntognas alvas pli ditg che usità. Cun ir cun ils skis sut il Piz Bavregn m'ha dumandà in auditur danunder che il num Glas vegnia. Uschia sa numna la fracziun da Tschappina sisum la cresta da la Muntogna ed era il pass che collia cun la Val Stussavgia. Cun l'auto pon ins ir mo enfin sin il pass, per descender datti be ina senda da sauma. Glas è ina furma da las bleras derivanzas dal latin claudere (enserrar) che nus avain mantegnì en rumantsch sco claus u clos. Cuntrari als lieus sco la Chlus a Landquart u Clüs a Zernez, nua ch'ins vesa co che la natira ha serrà en in territori, era Glas probablamain circumdà d'ina saiv.