Siglir tar il cuntegn

Cuntrasts Tatuadas – da dunnas e tattoos

La stad flureschan els sin la pel: Rosas e stilets, serps e draguns. E mintga stad vegnan da plirs a la surfatscha, surtut tar las dunnas. En ils Cuntrasts da RTR raquintan trais dunnas da lur relaziun cun ils tattoos.

Legende: Video TATUADAS – dunnas e tattoos abspielen. Laufzeit 24:59 Minuten.
Or da Cuntrasts dals 11.09.2018.

Ina statistica tudestga pretenda, che mintga segunda dunna tranter 25 e 35 saja tatuada. Il trend actual dals purtrets sut la pel è dimena giuven – e feminin.

Collecziunadra ed esteta: Melina Nicca

portrait.
Legenda: Melina Nicca – passiunada da l'estetica dals tattoos. RTR

Melina Nicca è collecziunadra d’art passiunada cun in cler senn per l’estetica. Ils maletgs, ch’ella collecziunescha na penda ella dentant betg vi da la paraid ma lascha furar els sut la pel. Sco ultimamain ina flur sin il schanugl. Sche Melina Nicca fa si las mongias revelescha ella bratscha plain tattoos.

Patruna da lavur e pertutgada persunalmain: Sandra Brunner

Portrait Sandra Brunner.
Legenda: Per l’ustiera Sandra Brunner han tattoos dapli che mo ina fassetta professiunala. RTR

Quai ch’è vegnì oz in purtret pli e pli usità, na saja stà avant radund 20 onns anc betg imaginabel en la gastronomia, raquinta l’ustiera Sandra Brunner. Ozendi percunter portia passa mintga segunda da sias camarieras in u plirs tattoos e mintgina dad ellas saja ina collavuratura preziusa en sia squadra.

Affarista da tattoos en in mund dad umens: Daniela Hirsiger

portrait.
Legenda: Daniela Hirsiger – affarista da tatuar cun tattoos. RTR

L’affarista Daniela Hirsiger procura per ch’il purtret sin las vias ed en ils bogns averts grischuns vegn pli e pli colurà. Cun ses um maina ella gia dapi passa 15 onns in studio da tatuar. Tar sias clientas tutgan dunnas giuvnas e veglias.

Ils motivs van da musters e poesias fin a tschess barbets e panters malgartegiads:

Las trais dunnas mussan en ils Cuntrasts, che Tattoos èn trendy – la relaziun da dunnas e tattoos n’è dentant insumma betg in novum. Dapertut nua ch’i deva umans cun pel clera tutga la decoraziun permanenta da la pel dad um e dunna tar las tradiziuns.

In cuc en ils studios da tatuar dad oz mussa che l’idea dal ritus d’iniziaziun u l’animal preferì che dat forza sa repeta puspè en l’unda actuala dals maletgs sin la pel.

Ed à propos tatuar ... co funcziuna quai?

Ord Telesguard

Legende: Video Tatuadas - dunnas e tattoos abspielen. Laufzeit 02:36 Minuten.
Or da Telesguard dals 13.09.2018.

Cuntrasts, 17:25