Patricia Scarpatetti – mamma per 36 uffants

Il film «Patricia Scarpatetti – mamma per 36 uffants» mussa pertge che la dunna da 36 onns s’engascha per tants uffants. Quai 24 uras a di e 7 dis l’emna.

Il plan da Patricia Scarpatetti da Cunter era: Ir a Honduras, s’engaschar per uffants en miseria e turnar suenter in onn. Il voluntariat en ina chasa d’uffants ha dentant midà tut. Suenter in onn è ella bain turnada en Svizra, il cor dentant è restà en l’America centrala. Ella è turnada a Honduras ed ha fundà in’atgna chasa d’uffants.

Oz, 10 onns pli tard, viva ella cun 36 uffants a San Pedro Sula, ina da las pli privlusas citads dal mund. Malgrà che lur dachasa è circumdà da mirs e fils d’atschal è quai per Patricia Scarpatetti l’insla dal cletg – cun il num «Yo quiero ser». Qua vul ella dar ad uffants che han per part in’istorgia tragica, ina nova schanza. Educar ils uffants è mo ina da las lavurs. Ella è tgirunza, psicologa, organisatura, administratura e cumbatta per ils dretgs dals uffants avant dretgira. Pudair gidar n’è per ella betg ina lavur, mabain in privilegi. In che dovra blera energia e va magari vi da la substanza. RTR ha accumpagnà Patricia Scarpatetti durant sia lavur.

Contribuziuns

  • Trailer

Dapli dal tema

RTR/td