Ina salata dad ovs per Pasca

Quests dis mangiain nus en Svizra var 30 pertschient dapli ovs che durant il rest da l’onn. Malgrà che las giaglinas fan gea trasora medem blers ovs. Per gidar las giaglinas è la redacziun dals Cuntrasts ida a la tschertga da differents ovs per servir a Pasca – per part ovs plitost surprendents.

En la terza ediziun da l’emissiun cun il num «Cuntrasts Focus» ha la redacziun chattà blers ovs da Columbus! La redactura Paula Nay è ida a filmar en ina cuschina sursilvana ed en in labor chantunal per ir a la tschertga da salmonellas, antibiotica e particlas nuschaivlas en ils ovs. Però chattà ha ella a la fin dals quints be buns menus e buns resultats da retschertga.

In veritabel «fan» dad ovs ha scuntrà Petra Rothmund – numnadamain l’architect Werner Schmidt da Trun. Quel ha construì numerus edifizis en furma dad ovs en tut la Svizra, ovs che procuran tenor el adina per in «cnacs» en il tscharvè.

I vegn intim e viril
Ed alura vegni fitg intim en l’emissiun – nus ristgain in sguard en ils «ovs» dals umens! U èsi da numnar la «marenda» masculina plitost cugliuns u forsa perfin testiculs? En mintga cas ha la redactura Bertilla Giossi sa laschà declerar d’in medi e d’in pertutgà pertge e co exact blers umens sa laschan sterilisar cun la metoda da l’uschenumnada «vasectomia». En ils chors virils na vegni normalmain betg discurrì savens da quell’operaziun – malgrà ch’ella è detg frequenta en il Grischun.

Per finir sa dumonda l’emissiun tge ch’il pled «endisch» ha da far cun ovs. Be in pitschen tip: Gnanc las giaglinas na san betg la differenza tranter l’ov e l’endisch.

Contribuziuns

  • Engiavina!

    Ina pitschna engiavinera per entschaiver l’emissiun.

  • Salmonellas, antibiotica e malsaun?

    Pudain nus insumma mangiar ovs cun in bun sentiment? Èn els propi sanadaivels? – In cuschinier ed in chemicher manegian senza targlinar: gea!

  • Ils ovs da Trun

    L’architect Werner Schmidt da Trun bajegia gugent ovs – malgrà che quels procuran per in “cnacs” en il tscharvè.

  • Quella chaussa dals umens

    Blers umens sa laschan sterilisar ozendi en ina tscherta vegliadetgna. Nus declerain ils privels, las consequenzas ed ils custs.

  • «Nagin’idea! – Sas ti?»

    Savais vus tge che in «endisch» è? E tge ha quel «endisch» da far cun la cifra 11?

  • «La glioir da Pasca» da Benedetto Vigne (supplement online)

    E tgi porta insumma ils ovs? – Bain cler, la lieur da Pasca! U forsa perfin il chantautur rumantsch Benedetto Vigne. Ina truvaglia per Pasca – in videoclip legendar da l’onn 1986, filmà en l’Hotel Tenigia en Val Sumvitg.

  • Trailer

Dapli dal tema

RTR/td/gc