Il pionier – Regurdanzas a Tista Murk

El è stà ina da las persunas las pli engaschadas en il mund rumantsch dal 20avel tschientaner. E surtut ha el inizià e fullà via en blers champs dal moviment rumantsch: en il teater popular, la litteratura, las bibliotecas, il radio e la televisiun. Tista Murk, naschì avant 100 onns a Müstair e mort il 1992 a Trun en Surselva.

Ma tgi era questa persunalitad rumantscha? E tge ha ella insumma prestà en tut las domenas da ses engaschament? – En occasiun dal 100avel anniversari da Tista Murk è Arnold Rauch, autur da films da Radiotelevisiun Svizra Rumantscha, sa mess en tschertga da fastizs e da perditgas da questa persunalitad. Perquai ha el chavà ora bler material filmic or dals archivs da RTR. El è sa chapescha ì a filmar en Val Müstair, tranter auter en Chasa Jaura e tar sia chasa paterna, però era a Trun en il davos domicil da Tista Murk. Ed el è perfin ì a Winterthur, nua che la nova biblioteca da la Scol’auta per scienzas applitgadas ha survegnì quest onn il num «Haus Tista-Murk».

Sin ses viadi da retschertga enavos en il temp ha Arnold Rauch per l’ina chattà instituziuns iniziadas da Tista Murk che funcziunan anc adina. Ma surtut ha el scuntrà persunas che sa regordan anc cun admiraziun da Tista Murk, da quest «praticher universal».

Dapli dal tema

RTR/td/al