Il misteri da Bargun 2

Ils 10 da settember 1984 vegn il chatschader lumnezian Venanzi Camensich mazzà durant la chatscha. In sajet or da curta distanza va tras ses satgados, tras ses corp ed en il perspectiv che l’um e bab da quatter uffants purtava enturn culiez. Tgi ch’ha sajettà, n'è mai vegnì or. I dat suspects. Ed i dat in suspectà: Robert Elvedi, da lez temp president communal da Cumbel.

Robert Elvedi era quest di a chatscha en il territori da Bargun ed el veva anc discurrì cun Venanzi Camenisch curt avant ch’igl è schabegià. Malgrà ch’i na dat nagins mussaments, hai bainbaud num en Lumnezia ch’el haja da far insatge cun la chaussa. Oz, 31 onns pli tard, raquinta Robert Elvedi per l’emprima giada sia versiun da l’istorgia. El raquinta co ch’igl è vegnì adaquella ch’ins ha entschet a suspectar el. E co ch’igl è stà per el a Glion en arrest d’inquisiziun.

A pled vegn era Toni Riedi, il policist da Morissen che ha fatg ina segunda inquisiziun set onns suenter il mazzament. Toni Riedi raquinta da dubis e suspects ch’i deva envers Robert Elvedi. E daco ch’el ha suenter diras interrogaziuns stuì laschar liber el.

Dapli dal tema

RTR/td/gc