Da la fora a la rusna

Debattas e cumbats mo pervia d’ina rusna! – Uschia pudess ins circumscriver a moda saloppa il cumbat da votaziun per il segund tunnel dal Gottard. Ma co è quai, da viver sper e cun ina tala «rusna», p.ex. al San Bernardino? E tge rusnas datti anc en noss mintgadi, dasper la famusa fora da schaner?

En la segunda ediziun da l’emissiun cun il num «Cuntrasts Focus» va la redacziun a fund a las rusnas! La redactura Petra Rothmund è ida tras il tunnel dal San Bernardino, ha però fatg fermativa davant e davos il tunnel e dumandà là ils abitants co els vivan cun quella rusna da transit.

Gia pliras rusnas ha chavà Ignaz Deplazes sin il santeri da Surrein – ed il chavafossas ha raquintà ad Eligi Derungs tge restanzas che vegnan mintgatant or da las fossas veglias.

Petra Rothmund ha scuntrà ina persuna ch’è mitschada per pauc da la mort: Toni Albrecht da Dardin. Sco giuven talent da snowboard era el crudà dal 2004 en il Vallais en ina sfessa da glatscher. Dals detagls da l’accident na sa regorda el betg pli – ina rusna da memoria.

E per finir va l’emissiun anc a la tschertga da rusnas che mintgina e mintgin da nus enconuscha: las pitschnas rusnas en ils t-shirts, adina sin l’autezza dal venter. Danunder vegnan quellas rusnas? Nus avain la resposta.

L’emissiun vegn moderada dad Anna Serarda Campell, correspundenta RTR en Chasa federala.

Contribuziuns

  • L’entschatta è ina fora ed la fin è er ina fora

    Noss mintgadi è be plain foras: radundas e profundas, diras e stgiras. In prolog.

  • Dus umens sa regordan (supplement online)

    Peter Wellig (San Bernardino) ed Alfred Furger (Valragn) sa regordan dal temp avant e durant la construcziun dal tunnel dal Vereina.

  • La vita sper la rusna

    Co èsi da viver cun e sper in tunnel da transit? – La reportascha da Petra Rothmund dal San Bernardino.

  • «Jesses Maria, tge che vegn tut ora!»

    Ignaz Deplazes chava sin il santeri da Surrein las davosas rusnas, e raquinta ad Eligi Derungs tge che resta suenter blers onns anc en las fossas.

  • «Jau sun vegnì or da la rusna!»

    Toni Albrecht da Dardin na sa regorda betg pli da ses grev accident sin il glatscher a Saas Fee. Cun las consequenzas dal trauma ha el però anc da cumbatter oz. In purtret.

  • «Vegn quai da la maschina da lavar?»

    Avais vus era da temp en temp pitschnas rusnas en il t-shirt, adina sin autezza dal venter? – Petra Rothmund è ida a la tschertga da respostas dal misteri da quellas foras.

  • Co vesa ina fora or? (supplement online)

    Stgira? Radunda? Quadratica? Gronda? – Nus avain dumandà diversas persunas da descriver per nus las rusnas che giran ad ellas en testa.

  • Trailer

Dapli dal tema

RTR/td