Purtret da l’emissiun

L’emissiun «Cuntrasts discurs» è in talk televisiv. Persunas prominentas rumantschas, ma era persunas sco «ti ed jau» raquintan a Rico Valär da lur experientschas, lur mintgadi e lur finamiras.

Rico Valär en il nov studio da televisiun.

Legenda da maletgs: Rico Valär moderescha dapi il 2012 il talk rumantsch. RTR.

«  Mintga discurs è per mai l’occasiun d’emprender d’enconuscher ina persunalitad rumantscha, da scuvrir sias experientschas, sias motivaziuns e sias visiuns. Jau less dar a las aspectaturas ed als aspectaturs ina invista en biografias fascinantas ed occupaziuns extraordinarias. »

Rico Valär
moderatur da «Cuntrasts discurs»

Quatter giadas ad onn po il moderatur Rico Valär beneventar in giast en il studio da televisiun dad RTR. El envida mintgamai ina persunalitad rumantscha che raquinta durant ina mes’ura da sia vita professiunala e privata, da ses mintgadi, da ses plaschairs e displaschairs, da sias ideas e motivaziuns, da sias passiuns e visiuns. Cun quest discurs survegnan l’aspectatura e l’aspectatur in’invista approfundada en la biografia da la persuna intervistada. En il decurs dals davos onns ha Rico Valär gia pudì beneventar diversas persunas profiladas en sia emissiun, uschia p.ex. l’ambassadur Oscar Knapp, l’artist Mirko Baselgia, l’actura Annemarie Duttweiler, la scolasta Patricia Scarpatetti, il publicist Iso Camartin ubain l’avat Vigeli Monn.