L'emprim ston ins chattar in product adattà. Da lez datti numnadamain ina massa differents. I dettia cremas u er gels e stgimas, declera Denis Veltri, possessura dal «Heaven and Tan», in studio cun duschas d'embrinir a Cuira. Tar certs products ves'ins directamain in effect, tar ils blers dentant ves'ins pér suenter duas fin quatter uras in effect. Dasperas datti er anc quels products ch' ins sappia duvrar mintga di e che dettian mo minim colur.
In peeling è igl A ed igl O
Impurtant saja da far in peeling avant che duvrar in product d'embrinir sasez, di Veltri. Plinavant stoppians era evitar ch'i haja ieli sin la pel, pia na betg unscher en avant.
«Per applicar il product dovr'ins il meglier guants. Uschia è il resultat pli gulivs.» La foppa dal schanugl ed il cumbel sco er parts cun pel dira duessian ins evitar. Suenter stoppian ins guardar che la pel na schigia betg ora, perquai ch'ina substanza en ils products d'embrinir dehidreschia la pel. Sch'ins na vul betg embrinir sasez a chasa, lura san ins era ir tar il profi e prender ina duscha d'embrinir.
