Traffic da Pasca

Ils dis da Pasca muntan per blers intgins dis vacanzas en il sid. En tscherts chantuns ed er tar ils vischins en la Germania cumenzan quests dis las vacanzas da primavaira, e cun quai er il prim grond traffic da vacanzas.

Quà èn ils puncts neuralgics da las vias naziunalas da vesair.
Legenda da maletgs: Quà èn ils puncts neuralgics da las vias naziunalas da vesair. RTR

Avant il tunnel dal Gottard quintan TCS, Astra e Viasuisse cun duas fin trais uras temp da spetga. Da gievgia fin venderdi quinta il TCS schizunt che la colonna na sa schlia betg.

Alternativas èn: il pass dal Simplon, il tunnel dal Grond Son Bernard u la ruta dal San Bernardino tras il Grischun. La varianta da chargiar l'auto sin il tren datti era anc: tras il Lötschberg, Furka e Vereina.

Dus puncts neuralgics en il Grischun

Cun temp da spetga èsi tenor la Polizia chantunala da quintar tranter Landquart e Zezras pervi dal plazzal e tranter Curia sid ed il tunnel Isla Bella. I na saja dentant betg da quintar cun colonnas uschè lungas sco avant il tunnel dal Gottard.

Er spetgar ston pli probabel quels che vulan chargiar l'auto sin il tren tras il Vereina. Quai tranter la damaun da las diesch e la saia da las otg.

Betg guntgir sin vias principalas

La Polizia chantunala cusseglia da betg guntgir las colonnas sur las vias principalas. Quellas na sajan betg previsas per il traffic da transit. Plinavant cusseglia la polizia da furmar ina giassa per pumpiers ed ambulanza uschè svelt ch'il traffic stagnescha. Vul dir: Autos che van dretg van dal tuttafatg dretg e tals che van sanester dal tuttafatg sanester.

Archiv RTR

Laschar ir video «Nua èsi da spetgar colonnas durant Pasca?»

Nua èsi da spetgar colonnas durant Pasca?

0:44 min, Telesguard dals 13.4.2017

Laschar ir video «Traffic da Pasca - il 2002»

Traffic da Pasca - il 2002

1:50 min, dals 1.4.2002

Laschar ir video «Traffic da Pasca lonn 2003»

Traffic da Pasca lonn 2003

2:22 min, dals 21.4.2003

Autur/a: Gion Gieri Flepp