Mintga onn puspè la medema dumonda: midar la cassa da malsauns ni betg? Fin la fin october ston las cassas da malsauns annunziar las premias per igl onn che vegn. Lura han ins peda fin la fin november da midar cassa. Per quintar ora sche quai renda ni betg, per quai dat igl agid en la rait.
Sin www.priminfo.ch, ina pagina da la confederaziun, san ins calcular en paucas minutas, sch'ins vegniss da spargnar tar ina midada e tar tge cassa ch'igl renda da midar. Era pon ins chattar là brevs da standard per desdir la cassa actuala.