Tips e trics per nettegiar il gril

Il Böög a Turitg ha empermess ina stad cun bell'aura e chaliras – aura perfetga per grillar. Per che las grilladas gartegian dentant er sto il gril vegnir schubregià e mantegnì.

Gril
Legenda da maletgs: Avant che cumnezar a grillar èsi da nettegiar. Pixabay

Cura ch'ins prenda il gril si da tschaler èsi tenor Stefanie Lombris, responsabla per la partiziun da gril en ina fatschenta da tegnairchasa e ferradira, impurtant da far giu la pulvra e controllar la tecnica. Er las lingias da gas saja da controllar e schubregiar per ch'il gas circuleschia endretg.

Suenter saja da tegnair schuber la surfatscha da grillar cun aua da savun ed in barschun da fier spezial per grils. Auters barschuns sajan ubain memia loms u memia dirs e fetschian uschia donn a la surfatscha.

Per tegnair schuber las autras parts dal gril cusseglia Stefanie Lombris ubain sprays spezials ubain la stgima ch'i dat per schubregiar il furnel. Il da grop cusseglia ella da schubregiar mintga giada suenter ch'ins haja grillà e sch'ins grilleschia pliras giadas ad emna, almain mintga duas emnas.

Autur/a: Gion Gieri Flepp