Per in chatschader fetschia quai senn da cumprar in char perspectiv. Cun quels vesian ins numnadamain meglier encunter saira ni la damaun cura ch'igl è tranter cler e stgir. Per insatgi che dovria il spievel da champagna be sin turas da viandar tanschian er ils models pli bunmartgads.
Con fitg duess il perspectiv engrondir?
Ils models che Romano Vasella venda engrondeschan tranter otg e 10 giadas. Cun in perspectiv ch'engrondescha 10 giadas vesian ins bain in zic dapli, il maletg è dentant er in zic pli malruassaivel. Cun in maun ruassaivel giaja quai però, manegia Romano Vasella. Per il diever da mintgadi tanschia dentant er il perspectiv dad otg giadas.