Tge far encunter laschar encrescher?

Qua tscherts tips per surmuntar meglier il laschar encrescher per ils da chasa.

Uffants en in camp.
Legenda da maletgs: Keystone

La preparaziun è fitg impurtanta:

Per ils geniturs:

  • Ins duess discutar avon il viadi cun ils uffants e declerar tge che spetga els. Quai pon ins visualisar cun fotografias e prospects u cun far gust sin puncts culminants dal viadi.
  • Ins duess declerar, ch'i dat el camp u tar il viadi autras reglas e structuras che a chasa. Il mintgadi vegni ad esser in pau auter.

Ils geniturs duessan vinavant discutar cun l'uffant sur dal laschar encrescher. L'uffant duess esser pertschart che quai «mal il cor» po esser pussaivel tar mintgin. Sco genitur duessan ins chattar ina varianta co ins po evitar quai:

  • Ils pli giuvens pon prender cun els in «plisch» u in plimatsch che savura sco a chasa. Als pli vegls pon ins dar cun in amulet u in auter simbol da forza.
  • Ins duess sco genitur vinavant prender si contact cun ils manaders dil camp, u cun ils scolasts. El cas ch'i vess dad esser insatge, san lez lura surprender in pauc la rolla dals geniturs.
  • En il temp digital d'ozendi n'èsi betg recumandà da telefonar mintga segunda saira e dumandar co l'uffant ha. Sche pussibel duessan ins insumma betg telefonar u scriver. Sin il pli sche l'uffant bragia, lura pon ins dar in telefon e dar forza, per dar motivaziun per ils davos dis.
  • Sch'i na vess la fin finala betg da funcziunar en il camp pon ins rumper giu il viadi ed empruvar il proxim onn danovamein.

Autur/a: Ivo Orlik