Tge è la differenza tranter in motor da benzin ed in da diesel?

Da principi transfurma schebain il motor da diesel, sco er quel da benzin energia chemica en lavur mecanica, u meglier ditg moviment. Cunquai ch'els ardan dentant differentas substanzas, funcziunan ils motors different.

Motor d'auto.
Legenda da maletgs: Motor d'auto. Pixabay

Il motor da benzin ha in indriz supplementar per envidar la maschaida da benzin ed aria. Vul dir, che las chandailas dattan la sbrinzla. Il motor da diesel na dovra dentant nagin indriz supplementar. Grazia a la cumposiziun chemica s'envida la maschaida dad aria e diesel da sez. Il motor da diesel fa damai ina auto-explosiun. perquai vegn el per part era numnà «Selbstzünder».

Ma tge motor è lura meglier?

Il motor da diesel è fitg ferm ed effizient. Vul dir ch'el dovra pli pauc ieli per la medema distanza cumpareglià cun in motor da benzin. Quai na munta però betg ch'el è pli bunmartgà u pli ecologic.

Uschia èn ils custs tenor il garagist Sinisia Damjanovic bunamain medem auts tar ils dus motors. Ed il motor da diesel producescha bain pli pauc CO2, dentant arda el pli tschuf ed emetta uschia dapli autras substanzas ch'èn nuschaivlas per l'ambient e per ils umans.

Diesel schela spert

In auter dischavantatg dal motor da diesel è che l'ieli schela fitg spert. Uschia vegn la substanza atgnamain gia a partir da minus tschintg grads dira. Ils tancadis mettan però tiers ina substanza che segirescha, ch'il diesel schela pir tar minus 20 grads.

Autur/a: Nora Baltermia