Noss corp consista da 73% aua e quella sto vegnir remplazzada. Perquai èsi impurtant da baiver avunda aua.
Dentant pon ins er baiver memia bler'aua. Sch'ins baiva radund 4-5 liters entaifer in'ura po quai avair consequezas mortalas. Il problem è che memia bler'aua vegn en il sang. Uschia na funcziuna la communicaziun tranter sang e corp betg ed i po dar in collaps dal corp. Ch'ins baiva tant'aua en pauc temp è savens il cas tar lutgas. Da quellas laschan ins damai meglier la detta.
Ma quant'aua è lura avunda?
Tenor il cussegliader da sanadad Corsin Deflorin datti ina regla per s'orientar: Ins avess da baiver in liter per 25 kilograms paisa a di.
Ed impurtant èsi da reparter questa quantitad sin l'entir di. L'uman na funcziuna betg sco in camel che po conservar l'aua. Sch'el baiva damai bler a la giada, lura na sa il corp betg prender si tut l'aua e dat simplamain giu quella en furma da secrets.