Paninis main chars

Emplenir l'entir quadern da Panini per il campiunadi mundial da ballape en la Russia 2018 po ir en ils raps.

rimnar Paninis
Legenda da maletgs: rimnar Paninis Keystone

Cun 682 tatgaders custa il quadern, senza barattar cun auters, passa 1'000 francs. Sch'ins po dentant barattar gia be cun diesch persunas sa reduceschan ils custs tenor in scienza svizzer sin bun 330 francs. Dapli persunas per barattar ch'ins ha, pli favuraivla daventa la chaussa.

Tatgaders spezialas pretendan acziuns spezialas

Panini daventa adina pli creativ cun tatgaders. Uschia datti quest onn dasper in tatgader persunalisà per 10 euros era anc 12 tatgaders da legendas dal ballape ch'ins chatta davos las etichettas da las buttiglias da PET da Coca Cola. Tgi che na vul dentant betg laschar baiver ils uffants tantas buttiglias da Coca Cola po ir a rimnar ils tatgaders tar rimnadas da PET u dumandar a lieus nua che Coca Cola vegn vendì, sch'ins pudess forsa be avair l'etiquetta.

Era per il tatgader persunalisà datti in trick

Il tatgader persunalisà pon ins far sin la pagina d'internet da Panini. Suenter in process plitost cumplitgà pon ins lura per 10 euros pustar il tatgader da sasez. Dentant vai era pli bunmartgà. Numnadamain crear il tatgader sin il telefonin ed enstagl da cumprar el char, far in screenshot e squitschar sco fotografia, tagliar ora e tatgar en il quadern da Panini. Voila.

Autur/a: Gian-Marco Maissen, Moderaziun: Rafael Müller