Pachetar en plantinas per l'enviern

Las notgs vegnan adina pli lungas ed era pli fraidas. Uschia na duvrain betg mo nus ina chapitscha ni in pullover pli gross mabain era las plantinas sin noss balcuns ed en curtin dovran ina protecziun. Pertge ina schelada sa numnadamain schon esser la fin per tschertas plantinas.

Purtret d'ina plantina en in cup.
Legenda da maletgs: Pixabay

Betg mo pervia da las temperaturas bassas èsi bun da pachetar en plantas e plantinas. In protectur ord taila protegia las plantas numnadamain era da naiv greva ni selvaschina che pudessan rumper la roma.

Pachetar en cun taila da vlies ni juta

Tenor Pascal Keller, ortulan da l'orticultura Wieland a Tumein dovrian cunzunt plantinas ch'èn anc en vaschs da fluras e da quellas ch'èn en curtin e restan igl entir onn ora verdas ina protecziun. Era plantinas che n'èn betg da chasa el Grischun sco per exempel la plantina da figs ni il rosmarin na survivan tut tenor betg las temperaturas bassas da l'enviern.

L'ortulan Pascal Keller recumonda da na po betg pachetar en las plantinas cun plastic. Uschia na sappian ellas numnadamain betg trair flad. Il meglier saja da pachetar en ellas cun taila da vlies ni juta. Impurtant saja da duvrar ina taila ch'isoleschia che laschia dentant era ir tras in pau aria.

Autur/a: RTR/sch