Nua dismetter il pignol da Nadal

En bleras vischnancas pon ins dismetter il pignol da Nadal tar la deponia communala. Intginas rimnan ils pignols tar ils lieus da rimnada da rument. Igl dat dentant era vischnancas che surlaschan la dismessa a mintgin savess. Per quels datti era autras pussaivladads da dismetter.

A Mustér, Scuol ni Andeer po la pignola vegnir dismessa tar las deponias communalas. Autras vischnancas fan turas da rimnada tar datas spezialas, savens communitgadas en il fegl uffizial, uschia a Glion, Flem ni era Cuira. En la vischnanca da Glion vegn dentant mo rimnà en la citad, en las fracziuns èsi different. Per exempel sto a Ruschein mintgin guardar sez nua dismetter. Il medem vala per exempel era per ils abitants da la vischnanca da Trun.

Pignola per gulivar las sendas da viandar

Savens vegn la pignola rimnada manizzada e lura cumpostada. A Glion vegnan ils 500-600 pignols era manizzads, ma lura betg cumpostads, mabain duvrads per gulivar las sendas da viandar. Quai vegn tenor il lavurer communal Toni Bearth gia fatg uschia dapi set onns.

Pignola sco pavel per chauras e nursas

Ma era inqual animal sa legra da survegnir in pignol. La famiglia Buchli da Scharans prenda gugent encunter pignols per dar a lur chauras, nursas e magari era als pors. Era chavals han plaschair da magliuccar vid la dascha. I vala la paina da dumandar il pur en la vischinanza sche qual ha interess vid il pignol da Nadal per dar quel als animals.

Brischar la pignola en pigna

Era lubì èsi da brischar il pignol en la pigna scalegl ni en il cheminé. Impurtant èsi dentant da laschar setgar bain il pignol, uschiglio dat quai bler fim durant brischar. E il pignol sitg e la lametta e las corda da las tschigulattas allontanadas, vesa Daniel Güttinger da luffizi per la natira e lambient nagin problem da brischar il pignol en pigna ni en il cheminé.

Contribuziuns

Laschar ir video «Pignol da Nadal»

Pignol da Nadal

1:05 min, Minisguard dals 7.1.2017

Autur/a: Ursin Lechmann