Naiv e glatsch sin l'auto po custar il bigliet

Investir la damaun in pèr minutas per schubregiar bain l'auto da naiv e glatsch renda. Na fan ins betg quai, poi dar chastis pulit auts e schizunt il permiss po quai custar.

Far bain davent la naiv dal auto è impurtant per la segirtad.
Legenda da maletgs: Far bain davent la naiv dal auto è impurtant per la segirtad. Keystone

Pertutgant la naiv èn las reglas simplas, ins sto allontanar tut la naiv da l'auto. Davent dal tetg, las fanestras, il viertgel dal motor e da la valischera, las chazzolas ed ils numers.

Cura ch'i va per sgarar davent il glatsch è quai auter. Obligatoric, sch'ins ha dus spievels da la vart, èsi da far liber la fanestra davant e las fanestras da la vart davant. Quellas davos n'èn ins betg sfurzà da far liber. Sco ch'ins va cun igl auto enavos, ston dentant tut las fanestras esser libras da glatsch.

Sch'ins na sa tegna betg vid las reglas, po quai dar in chasti da plirs tschient francs. En grevs cas pon ins schizunt perder il permiss da manischar.

Autur/a: RTR, Ursin Lechmann