Siglir tar il cuntegn

Header

audio
Talas "giraffas" chattan ins er sin las vias svizras.
Pixabay
laschar ir. Durada: 2 minutas 3 Secundas.
cuntegn

Las «giraffas» na san ins betg manar per il nas

Tgi che va memia spert cun auto sto quintar ch'ils apparats da radar fetschian ina fotografia e la polizia possia identifitgar el e far responsabel el. Ma pon els er identifitgar manischunzs da motos?

In casc che zuppenta la fatscha nè nagin index che pudess tradir l'identitad – quest maletg fa in apparat da radar sch'el fotografescha in motociclist da davant. Quai na vul dentant betg dir, ch'ils apparats da radar na pon betg identifitgar il motociclist. Pertge l'uschenumnada giraffa ha integrà duas cameras: ina fotografescha da davant ed ina da davos. Grazia a quai sa la polizia identifitgar il manischunz da mintga vehichel.


In'autra idea che l'in u l'auter pudess avair per manar per il nas las «giraffas» è da passar gist immediat suenter che la persuna avant è vegnida fotografada da l'apparat. Pertge in apparat dovra in tschert spazi da temp tranter duas mesiraziuns. Er quai na funcziuna grazia a la camera davos però betg. Pertge il vehichel è lura simplamain sin l'emprima fotografia e sto perquai ch'el n'è betg sa tegnì vid la distanza minimala perfin pajar in chasti supplementar.

Er avertir auters è chastiabel

Ed in chasti supplementar datti era per quels che vulan preservar auters da vegnir en controlla. Tenor artitgel 98a, vers 3 da la lescha davart igl traffic sin via, è quai numnadamain scumandà. Cun chats da gruppa che averteschan davart controllas da traffic èsi damai da far adatg. Quai cunzunt era perquai ch'ins è gia chastiabel sch'ins fa mo part dad in chat e betg mo sch'ins trametta er effectiv admoniziuns.


Ma po la polizia lura prender invista en il telefonin per mirar sch'ins fa part da tals chats? Na, quai na possia ella betg, ha Markus Walser da la Polizia chantunala confermà. La polizia haja dentant autras vias per controllas quai. Tgeninas possia el natiral betg tradir.

Dapli da «Co e cum»

Scrollar a sanestra Scrollar a dretga