Il postin porta las brevs e prenda cun il satg da resti vegl

Danovamain na ston quels che dismettan resti vegl betg pli far il viadi fin al proxim container da Texaid, mabain pon deponer quel gist davant chasa. Alura vegn quel prendì cun dal postin che porta mintga di las brevs ed ils pacs.

Durant il mais da matg èsi pussaivel da deponer il satg da resti veder avant la scaffa da brevs.
Legenda da maletgs: Durant il mais da matg èsi pussaivel da deponer il satg da resti veder avant la scaffa da brevs. Keystone

La fatschenta da textil Texaid e la posta lavuran ensemen. Durant il mais da matg èsi en l'entira Svizra pussaivel da deponer il satg cun resti vegl da Texaid avant la chascha da brevs. Quest satg vegn alura prendì cun dal postin che porta di per di las brevs. Quai è pussaivel tar tut las chasadas che survegnan era posta. En il Grischun datti dentant intginas excepziuns. A Samignun, Maladers sco era a Vaz n'ha l'acziun betg lieu.

Metoda pli ecologica
L'acziun da rimnar ils satgs cun agid da la posta è pli ecologic. Uschia possian ins nizzegiar sinergias cunquai ch'ils postins van uschè u uschia tar mintga chasada. Ir cun autos da vitgira per ils satgs è la varianta pli pauc ecologica. Plinavant spera Texaid dad augmentar la quantitad dal resti ch'els rimnan. Ils davos onns saja quella ida enavos fitg, quai ha il schef da Texaid ditg envers SRF. Grazia la metoda pli cumadaivla da dismetter resti spera la fatschenta da textil che dapli persunas èn motivadas da rimnar e dar giu lur resti vegl.

Fasa da project cun success
Texaid e la posta avevan fatg in project da pilot l'onn passà da rimnar ensemen ils satgs da resti. Quai avevan els fatg cun success a Lucerna. Uss duai quai dar vinavant talas acziuns da rimnada. Quai durant tschertas periodas da temp.

Autur/a: Selina Chistell