Far ord l'agen mountainbike in e-bike

Ils velos da motor èn en il trend. Adina dapli velocipedists sa movan ozendi cun in velo u in mountainbike cun motor, in sustegn oravant tut per ir ensi. Grazia ad ina nova tecnologia èsi oz era pussibel da fabritgar enturn l'agen velo en in e-bike.

Doping u dapli prestaziun per il velo – uschia pudessan ins numnar la nova tecnologia. Enstagl da cumprar in nov e-bike per plirs millis francs èsi dapi in temp pussibel da laschar montar vid l'agen velo in accu ed in motor. Quai saja pussibel vid mintga velo di Livio Bezzola, il maina fatschenta da Bike Grischun a Cuira.

Sco tar in e-bike vegn il motor bajegià tranter ils pedals e l'accu montà vid la rama. Quai nov motor ch'è vegnì inventà en Germania haja ina sumeglianta prestaziun sco in motor d'in normal e-bike. Er las funcziuns ed il manevrar sajan sumegliants precisescha Livio Bezzola. Con ditg che l'accu tegn dependia dentant adina dal sustegn dal motor. Quest motor custa cun l'entira montascha fin a duamilli francs.

Contribuziuns

Autur/a: Andreas Wieland