Evitar d'emblidar en la vegliadetgna

Sco che noss corp vegn cun la vegliadetgna pli debel e pli vegl, vegn era noss tscharvè pli vegl. Ins emblida pli spert chaussas, ins ha fadia dad emprender e da sa regurdar vi da memorias han ins era pli ditg. Cun in trenament per il tscharvè pon ins retardar il process.

Novas sfidas treneschan il tscharvè. Quai po per exempel esser l’occupaziun cun il computer ed il internet.
Legenda da maletgs: Novas sfidas treneschan il tscharvè. Quai po per exempel esser l’occupaziun cun il computer ed il internet. Colourbox

Cun il tscharvè èsi en sasez sco cun noss corp: Dapli ch’ins trenescha e pli fit ch’ins è. Plitost suenter la pensiun saja quai impurtant da trenar il tscharvè manegia Christian Koch, il co-schefmedi da la gerontopsichiatria dal servetsch psichiatric en Grischun. I saja tissi per il tscharvè da be seser davant la televisiun e spetga ch’i vegn saira.

« Rutina è tissi per il tscharvè. Tut quai ch’è nov è effectiv. Il tscharvè dovra ina sfida »

Christian Koch
Co-schefmedi da la gerontopsichiatria da la PDGR

Era la rutina è tissi per il tscharvè. Per exempel sch’ins fa dapi onns engiavineras da pleds cruschads, lura n’è quai betg pli in trenament. Il chau sa lura precis tge ch’el ha da far e per pli enconusch’ins las respostas gia prest ordador.

Precis il cuntrari stuess ins far per restar fit en il chau: esser activ e tschertgar ina nova sfida.

Pazienza, motivaziun e curaschi

Nov – nov – nov è la devisa per trenar il tscharvè. Cumenzar cun insatge tut nov è il meglier. Per exempel emprender ina nova lingua, far in curs da sautar, cumenzar in nov sport u ristgar dad ir vi da la tecnica sco il computer e l’internet.

Dentant datti era pli pitschnas chaussas per restar fit. Cun guardar veglias fotografias e sa regurdar vi da la situaziun sin la fotografia, sa regurdar vi da las persunas, vi dals nums ni numers da telefon e.e.e. In auter exempel è da leger la gasetta ed empruvar da sa regurdar vi dal text.

« Effectiv è il trenament sch’ins sa sto strapatschar il chau »

Christian Koch
Co-schefmedi da la gerontopsichiatria da la PDGR