«Reservar vacanzas online é sco ina lottaria»
Reservar vacanzas online saja in pau sco ina lottaria, manegia il docent da turissem da la HTW a Cuira, Domenico Bergamin. I na dettia betg in recept per chattar la meglra e pli favuraivla offerta. Mintga plattafurma generescha ils pretschs cun in algoritmus che saja secret. Però i dat tips e trics per pudair avair fortuna en la lottaria.
Pli baud sco pussaivel
Reservar las vacanzas pli baud sco pussaivel saja pli favuraivel. Las plattafurmas hajan contingents che stoppian vegnir duvrads per pudair far in gudogn. Perquai dattan ellas las offertas enfin ch'ellas han cuntanschì quest contingent pli bunmartgadas. Offertas da «last minute» na sajan betg usualas sin talas plattafurmas.
Uras e dis
Empustar vacanzas vi per l'emna po esser pli bunmartgà ch'empustar las vacanzas la fin d'emna. E la schanza è era pli gronda da survegnir in pretsch pli favuraivel sch'ins emposta la damaun e betg la saira. Motiv: il sistem da las plattafurmas registreschan quanta glieud che observescha la medema offerta. E pli blera glieud che quai è, e pli aut ch'il pretsch vegn.
