Cumprar en l'exteriur - co pretender enavos la taglia sin la plivalur?

Cun il curs da l'euro actual ed era ils pretschs bass en l'exteriur vali la paina dad ir a cumprar en l'exteriur. Cun pretender enavos la taglia sin la plivalur pon ins schizunt spargnar anc dapli.

Funcziunari da duana che bulla pliras quittanzas d’ina fatschenta per pudair pretender enavos la taglia sin la plivalur.
Legenda da maletgs: Funcziunari da duana che bulla pliras quittanzas d’ina fatschenta per pudair pretender enavos la taglia sin la plivalur. KEYSTONE

Per pudair pretender enavos la taglia sin la plivalur ston ins avair cumprà en per ina tscherta summa, sco quai che Nathalie Garny dal «Beobachter» explitgescha. Be lura pon ins pretender enavos la taglia sin la plivalur. La summa minimala variescha da pajais tar pajais. En l' Italia ston ins avair cumprà en per minimum 154 euros e 94 cents. En l'Austria per 75,01 euros. En la Germania na datti betg ina summa minimala.

Porschan tut las stizuns la cumpra libra da taglia?
Las stizuns en las terras vischinantas da la Svizra n'èn betg obligadas da porscher quest servetsch. Sche la stizun porscha da cumprar en senza taglias, ston ins emplenir ora in attest d'export. L'attest d'export è in formular cun il qual ins inditgescha tge ch'ins ha cumprà e quant tut ha custà. L'attest d'export po la stizun porscher sezza, ni ch'i sa tracta d'in formular d'ina interpresa spezialisada. Ina interpresa pli renumada è Global Blue. Avant che passar il cunfin, ston ins laschar bullar l'attest d'export a la duana dal pajais da destinaziun. Sch'ins viagescha cun aviun ston ins avair la rauba en la bagascha da maun. Il meglier declar'ins gia al check-in ch'ins haja rauba che stoppia vegnir preschentada a la duana. Sch'ins ha cumprà rauba che vala dapli che 300 francs ston ins anc declerar questa rauba tar la duana svizra.

Co pretender enavos la taglia sin la plivalur?
I dat pliras variantas. Sch'ins dispona d'in attest d'export ufficial, pon ins ir enavos tar la stizun e pretender enavos la summa en bar, ni laschar bunificar ella per la proxima cumpra. Per insatgi ch'abitescha pli lunsch davent dal cunfin n'è questa varianta probabel betg la megliera. Sch'ins ha obtegnì in formular d'ina interpresa spezialisada sco Global Blue, pon ins laschar pajar ora la summa bar d'in biro da l'interpresa. Tar Global Blue datti dentant er anc la pussaivladad, da trametter l'attest d'export cun posta. Ins po indicar, sch'ins vul che la summa vegnia pajada sin il conto da banca, la carta da credit u via schec da banca. Las interpresas spezialisadas quintan dentant insatge per lur service.

A Constanza datti schizunt automats per ils turists da cumpra. Là pon ins scannar l'attest d'export. La taglia sin la plivalur vegn silsuenter transferida automaticamain sin il conto. Era qua vegn tratg giu ina taxa.

Tenor Nathalie Garny vali pér lu la paina da far la lavur, sch'ins cumpra en per plirs tschient francs. Pli grondas stizuns regleschan en quest cas bleras giadas l'entira birocrazia.

Autur/a: RTR/cl