Co ves'ins sche la nova bancnota da 20 francs è originala?

La nova bancnota da 20 francs è qua. Ella duess simbolisar la creativitad da la Svizra. La colur resta cotschna e sper l'optica è era anc insatge auter nov: Ella è pli pitschna e da plastic.

Tschintg checks da segirtad per la nova nota da 20 francs.
Legenda da maletgs: Tschintg checks da segirtad per la nova nota da 20 francs. Keystone

Per tuts che n'èn betg segirs sch'els han gest retschavì ina bancnota originala, recumonda la Banca naziunala svizra tschintg checks da segirtad:

1. Test da globus
Entamez la bancnota è da vesair in globus. Sch'ins cupitga la nota da sanester a dretg, sche sa mova in artg violet sur il globus. Ed sch'ins cupitga la nota da davanten enavos, sa mida la colur dal globus.

2. Test da sdrimas
Sut il globus sa chatta ina sdrima da plastic. Vegn la nota muentada da sanester a dretg ves'ins pliras cifras da 20. En il stgir ves'ins plinavant circuls ed ina carta da la Svizra che glischan en colurs dartg.

3. Test da crusch
Sisum sanester sa chatta ina crusch cotschna. Tegn'ins la nota en la glisch, sa mida quella en ina crusch svizra.

4. Test da triangul
Davos vart dalla nota chatt'ins in traipiz. En la glisch percorsch'ins in fil da segirtad en il traipiz. E sin quai fil enconuschins pliras giadas la bandiera svizra e la cifra 20.

5. Test da palpar
Schins palpa cun il maun sur la cifra da 20, il maun ni il num Banca naziunala, sentan ins ina surfatscha pli malguliva che vegn da la stampa darom. Vegn la nota fruschada sin in palpiri alv, sche relaschan ils elements numnads ina colur cotschna.

Autur/a: Orlando Cadonau, Onna Riedi