Co scarsolar pli svelt

Ina cursa aval cun la scarsola fa gist uschè bler spass sco ina cun ils skis. Il meglier èsi lura, sch'ins vegn sco prim en l'arrivada. Ma co èn ins il pli svelt?

Persunas che scarsolan.
Legenda da maletgs: Scarsolar è era in sport che fa plaschair a pitschen e grond. Keystone

Il pli impurtant è ina buna scarsola. Il pli furber prenda in uschenumnà 'Rodel'. En congual cun scarsolas airias sco il 'Davoser' èn quellas flexiblas. Vul dir: Manischar la scarsola è in toc pli simpel. Ed ina scarsola ch'ins po manischar bain è automaticamain pli svelta ch'ina autra.

Statura è relevanta

La statura da la persuna fa ora bler. Quels che paisan dapli han (per ina giada) in avantatg. Per ils pli levs èsi alura impurtant, da sa far uschè pitschen sco pussaivel. Quai pervi da la erodinamica. Sch'ins metta lura anc pais sin la part davos da la scarsola lura vegn ins anc in zic pli svelt. U ch'ins va en dus sin ina scarsola. Uschia s'haja forsa era ina schanza cunter ils pli bain 'fabritgads'.

«Ma per esser propi il pli svelt datti be in: exercitar. Da nagut na vegn nagut» (citat da Gerhard Wildoner, scarsolader passiunà e manader d'ina butia da scarsolas).

Autur/a: Flurin Clalüna