Co sa preparar sin il midament sin telefonia digitala?

Davent dal 2018 n'èsi en Svizra betg pli pussaivel da telefonar sur la rait analoga. Lura piglia la Swisscom ord funcziun questa tecnologia. Fin lura ston tut ils clients midar sin telefonia digitala.

In telefon vegl cotschen.
Legenda da maletgs: Tals telefons pon ins duvrar era anc suenter l'onn 2018 - dentant mo cun in adapter. Dreamstime

Telefonia digitala vul dir telefonia sur internet. La gronda part dals clients che han in telefon cun rait fixa telefonan gia ussa sur internet.

Sa preparar ston damai mo quels che han anc in telefon ch'è fitgà directamain en la bischla da contact da telefon.

  • Telefons cun selectur: per tals telefons datti in adapter per circa 50 francs per attatgar els a l'attatg analog da la box d'internet, uschia ch'ins po duvrar els era en avegnir
  • Telefons analogs moderns: tals telefons funcziunan senza adapter, attatgads a l'attatg analog da la box d'internet
  • Telefons d'ISDN da firmas: per tals telefons dovri ina soluziun tecnica, damai in product che la Swisscom porscha
  • Telefons d'ISDN da privats: per tals telefons datti era soluziuns tecnicas, che na vegnan dentant betg sustegnids da la Swisscom

Da midar la tecnologia e stizzar la rait analoga ha la Swisscom decidì cunquai che quella rait na saja betg pli adattada al temp. Cun quai ch'era la televisiun giaja ozendi sur l'internet saja quai mo consequent d'era digitalisar la telefonia.

Autur/a: RTR/mü