Chapellinas na tegnan betg en etern

Avant intgins onns valevan ins sco betg cool sch'ins purtava ina chapellina sin pista. Oz perencunter èn quels che na portan nagina chapellina bunamain exots. 92 pertschient dals skiunzs e snowbordists protegian lur chaus cun ina tala. Ma betg en tut ils cas protegia ina chapellina avunda.

Chapellinas ston ins remplazzar da temp en temp
Legenda da maletgs: Chapellinas ston ins remplazzar da temp en temp keystone

Ina chapellina da skis tegna mo in tschert temp e betg en perpeten. Per regla tegnan chapellinas ch'ins cumpra en fatschentas svizras trais enfin tschintg onns, di Benedikt Heer dal Post da consultaziun svizzer per la prevenziun d'accidents (BfU). L'infurmaziun quant ditg che la chapellina tegna è da chattar sin la stgatla da la chapellina. Il material po numnadamain vegnir donnegià entras l'influenza da l'aura, la midada da chaud e fraid, ubain entras il sulegl.

Remplazzar chapellina suenter accidents

Er fridas ed accidents fan donn al material. Perquai cusseglia Benedikt Heer da remplazzar la chapellina sch'ins è crudà directamain sin ella. Plinavant cusseglia l'expert – per prevegnir ad accidents – da betg montar ina camera sin la chapellina. Sch'ins crodia numnadamain sin il chau lura possia la camera augmentar la rotaziun e procurar per anc pli grevas blessuras.

Autur/a: Selina Chistell / Sandra Carisch