Nagin vul esser il «scheiss-schiri»

Mintga terza uniun da ballape grischuna tschertga per il mument arbiters. Uschia per exempel era il CB Surses.

Ils stars da ballape en attatgaders, golis u artists a la balla. L’arbiter chatta dentant strusch in cool. In star n'è el uschè u uschia betg. Savens ha el schizunt dad ir enturn cun gronda critica e pleds trids.

Uschia na fai betg surstar, che adina pli paucs vulan insumma far l’arbiter. Questa primavaira ha la Federaziun da ballape grischuna mo pudì recrutar trais novs arbiters. Pel mument mancan tar 10 uniuns grischunas tut en tut 14 arbiters. Vul dir: Mintga terza uniun da ballape grischuna tschertga almain in nov arbiter. Quai è in grond problem.

Regla procura pli e pli per situaziuns criticas

La Federaziun svizra da ballape ha fatg suandanta regla d’arbiters: Per mintga arbiter ch'è en servetsch per in club pon duas squadras sa participar al campiunadi da liga. Sche la squadra n'ha betg avunda arbiters vegnian stritgadas ed exclusas equipas.

Cun questa regla vul la federaziun garantir avunda arbiters per ils gieus da campiunadi. Dentant la regla procura per pli e pli problems tar ils clubs. Els na chattan malgrà gronds sforzs nagins novs arbiters. Perquai sto ina equipa da 5avla liga sa retrair questa stad dal campiunadi. Ella n'ha er suenter ils dus onns da toleranza senza arbiter betg chattà in nov e na po uss betg pli participar.

Gian-Marco Maissen