Siglir tar il cuntegn

Header

cuntegn

En claustra Diari: Glindesdi

Viadi ed arrivada en claustra benedictina a Mustér.

Co scriv’ins in diari? «Mein liebes Tagebuch...» sco ch’i vegn numnà en ils films - u senza reglas perquai ch’in diari n’è betg pensà per auters egls che quels dal scrivent? Co ch’in diari vegn definì na sai jau betg, mai hai jau scrit en in tal. Quest qua è en mintga cas pensà per vegnir publitgà. E quel scriv jau sco ch’jau hai gist gust.

Valischa sin sezs dal tren
Legenda: Igl ha plaz per tuts. RTR, D. Hardegger

Las 13:56 parta mes tren davent da Cuira en direcziun Mustér. Pir ussa vegn si in pau gnervusitad. Tadlond ina playlist calmanta ses jau en quest tren che sa schluita sia via sisum la Surselva. «Fermada sin damonda» a Rabius-Surrein. Avant che star si per smatgar il buttun per fermar il tren realisesch jau ch'jau na vom betg a visitar mes parents sco pli baud mabain ch'jau vom en claustra.

Curt avant l'arrivada a mia destinaziun na van mes uregliers betg pli. Quels apparats da bluetooth han pers la colliaziun cun il telefonin. Quai na gida era betg propi encunter la gnervusitad - ma insaco arriv jau tuttina saun e salv a Mustér. Là entaup jau il correspundent bainvulent ch'ha gist era manischà mai avant «la porta gronda» da la claustra. Merci Gion!

Sco emprim poss jau retrair mia chombra e lura suonda in curt guid tras ils tracts da la claustra. Impressiunant quest edifizi. Jau ma legrel da pudair vesair anc dapli.

Ed uschia vegni era. Il temp durant la vespra da las 18:00 va spert speravia, uschè spert ch'igl è 1.82375 batterdegls pli tard temp per ir a tschaina. Oz hai dà ina schuppa, salata e nüdelis cun sosa da tomatas. Da la tschaina n'hai jau oz anc betg dastgà far maletgs. Guardar cura che la claustra benedictina lubescha quai. En mintga cas èsi bun da mangiar, e da quai survegn'ins qua avunda.

Per oz èsi crai scrit avunda. Igl è anc dad ir al «Komplet» a las 20:00, l'oraziun da la saira sch'jau na sbagl betg. Da quai lura fotografias insacura auter.

Artitgels legids il pli savens