Gion Antoni Derungs - mort avant 5 onns

Uss glindesdi, ils 4 da settember avant tschintg onns, è Gion Antoni Derungs mort.

Il cumponist Gion Antoni Derungs
Legenda da maletgs: Gion Antoni Derungs (1935-2012) MAD

Cun el ha la Rumantschia pers ses pli grond cumponist, in musicist da format ed irradiaziun internaziunala.

L'«Artg musical» sa regorda da Gion Antoni Derungs cun emetter tranter auter ses opus 174, in'ovra per orchester cumponida il 2007 cun il titel Bündner Tänze – Sauts grischuns. Simon Camartin dirigia la Südwestdeutsche Philharmonie Konstanz.

Lura dirigia Clau Scherrer ina da las davosas cumposiziun da Gion Antoni Derungs, Las Canzuns Lumnezianas (Péz Terri, Senza tei, Mia valerusa, Stagiuns e Canzun dallaua).

2011/12 ha Gion Antoni Derungs scrit l'ovra a posta per il 75avel dal Chor viril Lumnezia (2013). SolistAs: Letizia Scherrer (sopran), Selina Derungs (flauta), Hardy Pirovino (eufoni), Gieri Maissen (clavazin) e Gian Peider Casanova (percussiun).

Redacziun: Giusep G. Decurtins