Siglir tar il cuntegn
Inhalt

Actualitad Dispita da parcadis escalescha: «Sinergia» va a Domat

Il center administrativ dal chantun Grischun «Sinergia» na vegn betg bajegià sco planisà a Cuira, mabain sin l'areal vegl da la resgia gronda a Domat. Ins na saja betg vegnì perina cun la citad pervi dals parcadis, di Christian Rathgeb, il president da la regenza.

Legende: Video Sinergia a Domat abspielen. Laufzeit 00:42 Minuten.
Or da RTR dals 01.04.2016.

La citad da Cuira ha decidì d'adattar il project «Sinergia». En in’emprim‘etappa dal project eri stà planisà da far in parcadi, che duai lura vegnir remplazzà en ina segund‘etappa cun ina garascha sutterana. La citad da Cuira ha dentant decis che la garascha stoppia vegnir construida gia en l’emprim‘etappa. Il chantun ha perquai empruvà d’adattar il project cun agid d’in‘expertisa. Ma cunquai ch'il budget da 69 milliuns francs per l'emprim’etappa na dastga betg vegnir surtratg, na saja quai betg pussaivel, ha ditg Rathgeb.

A Domat avain nus avunda parcadis e nagins problems cun la citad da Cuira
Autur: Christian Rathgebcusseglier guvernativ

Urs Marti è trumpà

Il president da la citad è trumpà da questa decisiun. Urs Marti na crai betg che la decisiun da construir la «Sinergia» a Domat haja da far cun la dispita dals parcadis. Il motiv saja in auter:

Il chantun chatta nagin per emplenir il plaz a Domat, perquai van els sez leu
Autur: Urs MartiPresident da la citad Cuira
Plan dal center administrativ a Cuira vegn betg realisa sco planisà
Legenda: Il center administrativ Sinergia vegn betg realià sco planisà a Cuira MAD

Il chantun Grischun aveva cumprà ils dretgs da bajegiar per l'areal da la resgia veglia a Vial-Tuleu. Fin ussa vul mo la Hamilton AG da Panaduz bajegiar sin quest areal. Auters interessents n'hajan ins betg anc chattà. Tenor Urs Marti vul il chantun ussa ir sin quest areal per insumma savair emplenir quel.

Tge che duess capitar cun la plazza a Cuira Vest n'è anc betg cler.

Cur che dus sa scognan gudogna il terz

En l’emprim’etappa duajan vegnir realisadas 400 plazzas sin l'areal Vial-Tuleu a Domat. La presidenta communala, Beatrice Baselgia vesa en quai in grond gudogn per la vischnanca.

En la finamira da la vischnanca lain nus 3`500 plazzas, perquai savain nus duvrar fitg bain la Sinergia a Domat
Autur: Beatrice BaselgiaPresidenta communala Domat

La decisiun da la regenza da construir la «Sinergia» a Domat vegn uss avant il pievel da Domat. Mo era en quest punct è Beatrice Baselgia dal tuttafatg positiva. Ella saja persvadida, ch'ils abitants da Domat sajan averts per questa proposta.

Legende: Video Animaziun Sinergia a Domat abspielen. Laufzeit 00:52 Minuten.
Or da RTR dals 01.04.2016.