Jau gid da paletschar ora il potenzial.
Yvonne Filli è fitg spert en contact cun persunas. Ella gida gugent, sustegna gugent. Cun questa abilitad vesa ella tar autras persunas il potenzial ch’ellas han. Mintga insaquants onns ha l’Engiadinaisa midà plazza da lavur, tschappà en ina nova sfida professiunala.
Jau hai adina lavurà cun e per persunas.
Uffants ha Yvonne Filli nagins. Savì ch’ella na vul nagins uffants ha ella gia cun set onns. Ina collega ha ina giada manegià ch’ella saja in’egoista. Oz, vesend quant grev ch’igl è per giuvnas e giuvens, è ella cuntenta ch’ella na sto betg far quests quitads.
En la vita da lavur vegn savens discurrì da dunnas er en connex cun esser mamma. La dunna che n’è betg mamma e lavura vegn bleras giadas vesida sco ina dunna che vul far carriera. Ma la carriera era per Yvonne Filli mai il motiv da desister d'uffants.
Per mai era quai mai impurtant da far carriera. La decisiun da betg avair famiglia n’ha mai gì da far cun quest aspect.
Dapi blers onns abitescha Yvonne Filli en la Bassa, actualmain ad Au al Lai da Turitg. Ma en il cor è ella restada Engiadinaisa.
Zuoz è ina bellischma vischnanca, per mai sco in museum open-air.