Siglir tar il cuntegn

Header

video
L’invasiun da la Bassa
Or da Cuntrasts dals 18.09.2022.
laschar ir. Durada: 26 minutas 15 Secundas.
cuntegn

Vitgs vids e tuttina occupads L’invasiun da la Bassa

La pandemia da corona ha procurà per in’invasiun da cumpraders d’immobiglias si da la Bassa anc mai vesida. Las consequenzas èn enconuschentas: Ils pretschs da cumpra d’immobiglias ed ils tschains-chasa s'auzan senza fin e remischun. Quai tuttavia betg mo en lieus turistics.

Vid l'exempel da Camuns e Tersnaus, dus pitschens vitgets da purs a l'ur, mussa «L’invasiun da la Bassa» las consequenzas da quest novissim «svilup».

Vitg fotografà or da l'aria.
Legenda: Camuns. RTR

Vis dal lontan vesa Camuns ora sco adina. Dentant cugliuna quest maletg. Uschè intact sco il vitg para, uschè radicalmain è el sa midà. Aveva Camuns ina giada sur 100 abitants, dumbra il vitg oz anc 27. La gronda part da las chasas èn en mauns esters. Il vitg è daventà l’unfrenda d’in veritabla invasiun si da la Bassa. In’invasiun paschaivla e giavischada sco quai che l'autur Gieri Venzin mussa en ses nov film.

Vitg fotografà or da l'aria.
Legenda: Tersnaus. RTR

A Tersnaus, en il vitg vischin da Camuns, crescha il dumber d'abitants puspè levet ils davos onns. Tersnaus è in da quels paucs vitgs che n'è anc betg vendi or dal tut. La cumpart dad abitaziuns secundaras è cun da quai da 30% relativamain bassa. Sper novas famiglias èn era insaquants giuvens si da la Bassa vegnids natiers. Els furman ina uschenumnada WG ed els èn vegnids per star e per muventar insatge. Lur finamira: dar vita al vitg e persvader giuvnas e giuvens dad er vegnir a star a Tersnaus.

La sort da Camuns ha adina puspè fatschentà la publicitad svizra. Camuns sco exempel per quels numerus vitgs da purs da muntogna ch'èn sa svidads uschè andetgamain ils davos 50 onns. Sa basond sin nov material da film mussa «L’invasiun da la Bassa» co e pertge che quels èn sa svidads e constatescha: L’emigraziun en la Bassa è tut auter ch’in fenomen da crisa, mabain il fenomen da la gronda bainstanza che regia dapi decennis en noss pajais.

A pled en il film vegnan indigens e persunas da la Bassa che vulan vegnir e star en vitgs sco Camuns u Tersnaus:

Dunna cun chavels nairs
Legenda: Cordilia Derungs. RTR

Cordilia Derungs da Oetwil sper la Limmat ha cumprà la chasa da sia tatta da Camuns e fa quint da turnar en ses vitg nativ suenter la pensiun.

Um giuven cun chavels blonds
Legenda: Leander Albin. RTR

Leander Albin, scrinari, scolast e musicist. El è ì davent da Tersnaus e suenter insaquants onns en la Bassa puspè turnà ensi. El viva en ina uschenumnada WG ensemen cun giuvnas e giuvens da la Bassa che vulan vegnir a star a Tersnaus.

Dunna giuvna cun chavels blonds.
Legenda: Joana Horni. RTR

Joana Horni, pedagoga curativa da Lucerna, viva dapi dus onns en la uschenumnada WG da Tersnaus. Ella stat per in trend che sa derasa pli e pli tranter la giuventetgna da la Bassa: Viver cun la natira ina vita ecologicamain correcta.

audio
L'autur Gieri Venzin davart il Cuntrasts «L’invasiun da la Bassa»
ord Actualitad dals 15.09.2022.
laschar ir. Durada: 3 minutas 35 Secundas.

Or da l'archiv

video
Il vitget Camuns
Or da RTR Social dals 14.09.2022.
laschar ir. Durada: 14 minutas 17 Secundas.

RTR Cuntrasts 17:25

Artitgels legids il pli savens

Scrollar a sanestra Scrollar a dretga