En scola ed a la cassa, tar la Spitex ed en l’ospital – dapertut, nua ch’i vegn stretg en la crisa da corona procuran en emprima lingia dunnas, che tut funcziuna. Da lur lavur a chasa ed en famiglia gnanca da discurrer.
Grazia fitg a las dunnas
Quai ha er remartgà la presidenta da la Confederaziun. Simonetta Sommaruga di en discurs cun Vita e cretta:
Tge che questa crisa ha mussà è, quant bler che dependa da l’engaschi da dunnas. Nus avain dad engraziar fitg, fitg bler a las dunnas.
Malgrà lur «relevanza per il sistem» - tge che na vul dir nagut auter che, ch’i na va betg senza ellas – èn tant las pajas sco er las cundiziuns da lavur per dunnas savens betg bunas.
Relevantas per il sistem – gea, ma lur paja?
Per las persunas en la tgira, in tipic sectur da lavur per dunnas, è sa pegiurada ina situaziun, ch’era gia difficila. Applaus è bel, ma i vul dapli:
Ins ha dà blera renconuschientscha, bler applaus, ma la fin vai per avair er las cundiziuns da lavur correspundentas.
Perquai saja ella cuntenta, di Simonetta Sommaruga, ch’il Cussegal federal sustegnia la cuntraproposta a l’iniziativa da tgira. En pli haja ella gì plaschair, ch’il parlament haja decis da pajar a las persunas cun pajas bassas en lavur curta 100% da lur paja.
Simonetta Sommaruga – la managera da crisa
Ina dunna era ed è anc adina en il center da l’attenziun pervi dal coronavirus – igl è Simonetta Sommaruga sezza. Quest onn ha l’uffizi da la presidenta da la Confederaziun survegnì ina nova dimensiun. Enstagl da sa deditgar a represchentar la Svizra, ha ella stuì daventar managera da crisa.
En quest temp, cura ch’il Cussegl federal ha gì da trair grondas decisiuns, ch’eran per la populaziun e per il mintgadi dals umans propi rigurusas, èsi stà per mai fitg impurtant, dad intermediar en il Cussegl federal.
Simonetta Sommaruga è daventada l’intermediatura. Ella ha mitigià e discutà en il Cussegl federal e cun ils chantuns, ha empruvà adina puspè da prender la populaziun en la bartga ed ha telefonà er gia direct a la presidenta da la Cumissiun europeica, ad Ursula von der Leyen, per debloccar in transport da mascras al cunfin.
Ina da las 100 dunnas las pli pussantas dal mund
Prestaziuns, ch’èn er vegnidas vesidas sin livel internaziunal. Uschia ha il magazin d’economia american Forbes tschernì Simonetta Sommaruga sin plaz 56 da sia glista da las 100 dunnas las pli pussantas dal mund.
Tut las dunnas, scriva Forbes, hajan nizzegià lur pussibilitads per prender per mauns la sfida dal coronavirus – er la pli famusa managera da crisa da la Svizra, la presidenta da la Confederaziun Simonetta Sommaruga.
