«Jeu creiel enten in Diu, Bab tutpussent», aschia entscheiva il credo da nus cristians. E semegliont tuna ei en nossa pli enconuschenta oraziun: «Bab nos, qual che ti eis en tschiel». Il plidentar Diu sco «Bab» ei usitau, normal.
Pil di dad oz, pil di dallas mummas, less jeu bugen far in regal a tuttas dunnas e mummas.
In regal en fuorma dall’enconuschientscha che Dieus ei buca sulet nies bab, mobein era nossa mumma. Gest els cudischs dil Veder Testament vegn Dieus numnadamein caracterisaus en differents loghens cun tratgs materns. Bein vegn Dieus mai numnaus explicitamein nossa «mumma». El vegn oravontut descrets entras siu agir e sentir sco mumma.
In dils bials exempels ei d’anflar el cudisch Numeri. Nus udin leu da Moses che piarda la pazienzia cul pievel d’Israel. Ils Israelits san numnadamein far nuot auter che tugnar sur da lur situaziun, sur da tut quei che maunca ad els sin lur viadi tras il desiert. Sur da quei s’alterescha Moses ed el lai ora siu frust sin Diu e fa reproschas ad el. Quei tuna aschia: «Pertgei mudregias mei, tiu survient, sin tala moda? Pertgei cargas sin mei il buordi da quei entir pievel? Sun forsa jeu vegnius en speronza cun quei entir pievel, hai jeu parturiu el, che ti dis a mi: Porta il pievel vida tiu pèz sco ina nutridra porta in pop, tochen en la tiara che ti has empermess a ses perdavons.» (Num 11,12)
Moses sesenta surdumandaus en siu pensum da tgamunar il pievel ed el stauscha la responsabladad anavos sin Diu. Buca el, Moses hagi parturiu ils Israelits, mobein Dieus. Vegnir en speronza, parturir, nutrir in pop vid il pèz. Pli feminin e matern va ei buca pli! Quei text, ed aunc auters expriman: Dieus ei ligiaus cun siu pievel d’Israel sco ina mumma cun siu affon.
Schebein nus plidentein Diu sco nies bab ni sco nossa mumma – nos plaids astgan mai reducir Diu sin ina schlatteina feminina ni masculina. Bia dapli vulan tals plaids exprimer nossa relaziun cun Diu. Sche Dieus ei nies bab ni nossa mumma, essan nus sias feglias e ses fegls. E carezia, schurmetg, confidonza anflein nus schibein tier nossa mumma sco era tier nies bab. Schibein tier quel sin tiara, sco era tier quella en tschiel.