Siglir tar il cuntegn

Header

audio
In pumer ch'empermetta ritga racolta - il Forum grischun da la religiuns
Or da Vita e cretta dals 10.01.2021.
laschar ir. Durada: 59:37 minutas.
cuntegn

Forum grischun da religiuns Missiunar scumandà – religiuns grischunas s’uneschan en in forum

Umans da 120 naziuns ed ina trentina da communitads religiusas – il Grischun è pli multifar che mai. Cun questa multifariadad crescha er il privel da viver in sper l’auter or.

Precis qua vul il nov Forum grischun da las religiuns stgaffir ina cuntrapaisa. Dapi il november passà exista el sco uniun, che vul porscher a tut questas cuminanzas ina pussibilitad da sa scuntrar.

Discurrer in cun l'auter po evitar rassissem

L'inizanta dal forum è Barbara Hirsbrunner da Scharans. Sco commembra dal cussegl da la baselgia evangelic-refurmada chantunala ha ella adina puspè discurrì e discutà cun autras communitads religiusas en Grischun ed uschia prendì si il dialog interreligius. Ella è persvadida che discurrer ensemen po evitar rassissem:

Ins n'ha betg tema da quai ch'ins enconuscha.
Autur: Barbara Hirsbrunnerinizianta, baselgia evangelic-refurmada chantunala
Portrait.
Legenda: Barbara Hirsbrunner – inizianta dal Forum da religiuns grischun e cussegliera da la baselgia evangelica grischuna. mad

A tut quests discurs ed inscunters porscha uss il Forum grischun da las religiuns in dachasa. El duai esser ina plattafurma per che persunas religiusas ed interessadas vi da religiuns pon emprender d'enconuscher in l'auter.

«In pumer, che vegn a purtar ina racolta ritga»

L'interprendider Basbayandur Hüseyin abita a Tusaun. Oriundamain è el da la Tirchia. Da sia patria n'ha el betg be prendì cun sai sia persvasiun religiusa, ma er l'experientscha che discurrer ensemen po gidar ad evitar conflicts. En Grischun fa el part da la cuminanza asiatic-islamica.

Dapli dal Forum da las religiuns grischun

Textbox aufklappenTextbox zuklappen

Il Forum da las religiuns grischun (Bündner Forum der Religionen BFR) è vegnì fundà ils 7 d'october 2020 a Cuira. Part fan actualmain 12 cuminanzas religiusas. Il president è Basbayandur Hüseyin da la Cuminanza asiatic-islamica.

Ils commembers da fundaziun:

  • Giovanni Feola (Somaskanda Ashram)
  • Azamit Berhane (Cuminanza eritreic-ortodoxa)
  • Basbayandur Hüseyin (Cuminanza asiatic-islamica)
  • Pater Francis Venmenikattyil (Baselgia catolica)
  • Lucina Lanfranchi (Center budistic)
  • Alfred Enz, Rita Gianelli (Baselgia refurmada)
  • Rafael Mosbacher (Cuminanza giudaica)
  • Behjia Hadzic, Ibrahim Hadzic (Societad culturala bosnica)
  • Marcel Schildknecht (Baselgia novapostolica)
  • Senthilnathan Thevasuntharalingam (Societad Hindu)
  • Tina Büchi (Fokus C)

Il forum è organisà sco uniun ed ha fingia tegnì sias emprimas radunanzas. Actualmain vegn lavurà vi dad ina pagina en la rait.

Il forum sa distanziescha explicitamain da l'islam politic. Quai ha el fatg a savair ils 4 da december 2020 en si'emprima communicaziun a las medias. «L'islam politic n'è nagin Islam» ha el scrit sco reacziun a las attatgas da terror da l'atun passà.

Basbayandur Hüseyin è l'emprim president dal Forum da las religiuns grischun. Sia lavur vesa el sco investiziun en l'avegnir.

Cun il Forum da las religiuns grischun avain nus mess in pumer, che vegn a purtar racolta ritga per las proximas generaziuns.
Autur: Basbayandur Hüseyinpresident Forum da las religiuns grischun

Ina cuminanza religiusa possia porscher dapli che be in da chasa spiertal, è Basbabayandur Hüseyin persvadì. Savens chattian umans dalunsch da lur dachasa oriund en la cuminanza a l'ester umans cun las medemas persvasiuns e sfidas sco els sezs. Perquai gioga la religiun ina rolla centrala tar lur integraziun en la societad grischuna.

«Nizzegiar la religiun sco resursa»

In forum sco lieu d'inscunter per diversas cuminanzas religiusas è in'idea nova per il Grischun – dentant betg per auters chantuns. En il chantun Turitg datti gia dapi 20 onns in forum sumegliant. En il chantun Turitg è l'etnolog ed istoricher grischun, Marc Bundi, responsabel per il dialog interreligius.

Cun ses savair e sias experientschas ha el gidà da metter en pe il Forum da las religiuns grischun. Central per in lieu, nua che differentas persvasiuns duaian s'inscuntrar, saja, che nagina religiun haja dapli valur che l'autra – il gremi sco plattafurma neutrala.

Ina dumonda cardinala per s'inscuntrar tranter religiuns è quella dad in scumond da missiunar.
Autur: Marc Bundiresponsabel dialog interreligius, chantun Turitg
Portrait.
Legenda: Marc Bundi – cussegliader per metter en pe il Forum dal religiuns grischun ed incumbensà per il dialog interrreligius a Turitg. mad

Perquai cuntegnan ils statuts dal Forum da religiuns grischun er explicitamain il scumond da missiunar. A la radunanza da fundaziun èn s'exprimids er tut ils commembers da fundaziun cleramain per l'idea da betg vulair missiunar, ma s'inscuntrar.

Vita e cretta 08:03

Artitgels legids il pli savens

Scrollar a sanestra Scrollar a dretga