En las stretgas po ins spert vegnir. En situaziuns da malsognas, suenter in divorzi ubain sch’ils daners na tanschan simplamain betg a la fin dal mais per rabagliar tras l’entira famiglia.
Per il solit ins sa turpegia d'admetter ch'ins è pover, ed i va ditg enfin ch'ins sa lascha gidar. Blers na fan insumma mai quest pass.
E gist perquai saja l’agid d’instituziuns caritativas impurtant, menziunescha Corina Pfiffner. Ella presidiescha la Societad d’agid evangelica Cuira. Quella porscha sustegn nunbirocratic cura che las instanzas publicas vegnan a lur cunfins. Finanzià vegn il sustegn cun donaziuns, legats, contribuziuns da commembradi ubain cun collectas.
Uschia pon per exempel vegnir pajads ina giada ils custs per in quint, in fit da l’abitaziun u chaussas nizzaivlas per famiglias sco in char annex per velos.
Enstagl d'investir daners en reclama, realisain nus plitost projects che fan senn. Quels èn alura er ina buna reclama per nossa uniun.
Pertge che la societad ha per part gronda fadia da cuntanscher persunas en miseria, pertge ch’ins na vul tuttina betg far reclama e tgi che po profitar da l’agid da la Societad d’agid evangelica, da quai raquinta Corina Pfiffner en Vita e cretta.