Siglir tar il cuntegn

Header

cuntegn

Vita e cretta Da la pandemia ed autras sfidas – Las baselgias ed il 2022

En ses salid da Nadal ha papa Francestg urà per la fin da la pandemia. Las baselgias èn dentant confruntadas l'onn 2022 anc cun diversas autras sfidas. L'emprima Vita e cretta da quest onn preschenta intginas da quellas en in discurs cun la schurnalista e teologa Judith Wipfler.

papa francestg
Legenda: Papa Francestg tar l'uraziun Angelus da Nadal. Keystone

En confrunt cun auters onns era la Plazza da Son Peder a Roma quasi vida da Nadal. L’uraziun Angelus da Papa Francestg è vegnida transmessa via livestream. Il coronavirus na lascha vegnir a ruaus a nagin – e perquai è er il chau da la baselgia catolic-romana s'engaschà per las mesiras cunter la pandemia. La pandemia vegnia ad accumpagnar las baselgias dal mund er il 2022.

Segir sco l'amen en baselgia – il coronavirus il 2022

Las baselgias grondas sajan s'installadas dretg bain en la nova realitad dad ina vita cun la pandemia. Quai raquinta Judith Wipfler, teologa e manadra da la squadra religiun tar radio SRF en l'emprima part dal discurs cun Vita e cretta – «Las baselgias ed il 2022 - da la pandemia». Tuttina na saja anc betg reussì, da tegnair ils umans en baselgia.

audio
Las baselgias ed il 2022 – Da la pandemia
ord Vita e cretta dals 02.01.2022.
laschar ir. Durada: 6 minutas 26 Secundas.

Serrar las portas da baselgia per dal bun saja in trend, ch'ins possia er observar tar baselgias libras u evangelicalas. Malgrà ch'ellas sajan en sasez drizzadas en bain per in mund religius digital, vivian quellas baselgias fermamain da la vita en cuminanza. E quella n'haja betg pli pudì avair lieu il temp da la pandemia, di Judith Wipfler. Quai haja l'ina u l'auter nizzegià per partir da baselgia ora.

Muments suleglivs grazia ad in vent frestg

Uschia pudess ins resumar la segunda part dal discurs cun Judith Wipfler – quel che tracta las previstas 2022 per las baselgias. In dals temas gronds vegn ad esser qua la via sinodala. Quai è la gronda debatta da refurma, ch’il Papa Francestg ha imponì a la baselgia catolic-romana.

audio
Sfidas e schanzas per las baselgias il 2022 – In discurs cun Judith Wipfler
ord Vita e cretta dals 02.01.2022.
laschar ir. Durada: 9 minutas 49 Secundas.

La partenaria da discurs Judith Wipfler

Avrir la box Serrar la box
Judith Wipfler, ina partenaria da discurs tschertgada
Legenda: Judith Wipfler, ina partenaria da discurs tschertgada La teologa e schurnalista qua en discurs cun la Sternstunde da SRF. SRF

Judith Wipfler (*1974) è da Basilea e maina dapi il 2014 la squadra religiun da radio SRF. Per ses merits en il dialog interreligius ha la redactura da radio e teologa survegnì il december passà il titel da «Doctrix theologiae honoris causa» da l’universitad da Berna.

En Svizra vegn quella via sustegnida decisamain da l’uvestg da Cuira, Joseph Maria Bonnemain. Grazia ad el ha midà il vent en l’uvestgieu da Cuira dad in vent fraid en in vent frestg. L’uvestg da Cuira procura per dunnas en posiziuns impurtantas da la baselgia, sco per exempel cun numnar ina dunna sco pledadra da l’uvestgieu. En pli s’engascha el per sclerir ils abus en la baselgia catolic-romana.

Dentant er nivlas nairas a l’orizont 

Quels abus vegnan er ad occupar vinavant, è persvadida Judith Wipfler. Dad ina vart saja ina cumissiun istorica da l’universitad Turitg occupada cun s’approfundar en la tematica.

Da l’autra vart stoppian ins dentant er far quint ch’i vegni a dar anc dapli scuvertas malempernaivlas. Abus haja quai er dà tar dunnas, ch’eran e sun en il servetsch da la baselgia. E da quels vegni anc strusch discurrì.

audio
Vita e cretta – l'emissiun entira
ord Vita e cretta dals 02.01.2022. Maletg: Keystone
laschar ir. Durada: 1 minuta.
audio
Pled sin via da Christoph Reutlinger
ord Vita e cretta dals 02.01.2022.
laschar ir. Durada: 2 minutas 57 Secundas.

Vita e cretta 08:00

Artitgels legids il pli savens